ГУП Скопје

05/03/2026

ГУП-от е со поминат рок од четири години, новиот допрва ќе се крои

Од Град Скопје информираат дека во подготовката на новиот ГУП се предвидува вклучување стручни лица и експерти од различни области и оти станува збор за комплексен и повеќефазен процес, кој опфаќа детална анализа на постојната состојба во градот, изработка на нови плански решенија, усогласување со релевантните институции, како и спроведување на законски пропишаните процедури, вклучително и јавни расправи и стручни ревизии. Притоа, појаснуваат дека се става акцент на транспарентноста на процесот и на информирањето на јавноста.

– Предвидено е формирање тело преку кое граѓаните, стручната јавност и граѓанските организации ќе можат активно да учествуваат со свои предлози и мислења во текот на подготовката на планот. Целта е новиот ГУП да биде план што ќе ги балансира развојните потреби на градот со заштитата на јавниот интерес, квалитетот на живеење и заштитата на животната средина. Но, и да се донесе модерен, одржлив и инклузивен ГУП, кој ќе биде во интерес на сите граѓани на Скопје – наведуваат градските власти

Рокот на Генералниот урбанистички план за Град Скопје (2022-2032 година) е поминат веќе четири години, а метрополата сè уште нема нов, иако, како устав за градот од аспект на градењето и урбанистичкото планирање, треба да овозможи во иднина тој да се развива не само рамномерно туку и хумано.

Од Град Скопје информираа дека во моментов е започната постапка за подготовка на новиот ГУП за Град Скопје.

– По подолг период на застој, институциите работат на откочување и реактивирање на процесите што, според достапните информации, биле заглавени во изминатите неколку години – велат градските власти.

Додаваат дека во подготовката на новиот ГУП се предвидува вклучување стручни лица и експерти од различни области и оти станува збор за комплексен и повеќефазен процес, кој опфаќа детална анализа на постојната состојба во градот, изработка на нови плански решенија, усогласување со релевантните институции, како и спроведување на законски пропишаните процедури, вклучително и јавни расправи и стручни ревизии.

Притоа, појаснуваат дека се става акцент на транспарентноста на процесот и на информирањето на јавноста.

– Предвидено е формирање тело преку кое граѓаните, стручната јавност и граѓанските организации ќе можат активно да учествуваат со свои предлози и мислења во текот на подготовката на планот. Целта е новиот ГУП да биде план што ќе ги балансира развојните потреби на градот со заштитата на јавниот интерес, квалитетот на живеење и заштитата на животната средина. Но, и да се донесе модерен, одржлив и инклузивен генерален урбанистички план, кој ќе биде во интерес на сите граѓани на Скопје – наведуваат од Град Скопје.

Претходно, поранешната градоначалничка на Град Скопје се обиде на крајот од својот мандат да го придвижи процесот на донесување на нов ГУП, со тоа што во август минатата година беа организирани јавни дискусии одделно за градските квартови во сите скопски општини. Но, тогаш градските власти се пожалија дека нема интерес од граѓаните за јавните дискусии во однос на изработката на ГУП, па тие беа скратени и во еден ден беа опфатени по повеќе општини и се сведе на тоа, без сумирани информации за јавноста во однос на предлозите и барањата на граѓаните.

Дел од експертите тогаш беа на ставот дека единствена шанса за Градот Скопје е новиот генерален урбанистички план да ја промени досегашната лоша урбанистичка практика, но и потенцираа дека изработката на ГУП мора да се заснова на ажурни и детални податоци за сите сфери: домувањето, сообраќајот, здравството, образованието, социјалните услуги, урбаното зеленило, управувањето со отпад, квалитетот на воздух, комуналната инфраструктура.

Генералниот урбанистички план е документ од најголема важност за развојот на градот. Во него се дефинира за колку жители има градот капацитет, со колкава густина и максимална катност да се гради, колку и каде има потреба од јавни институции, колку и каде треба да има паркови, колку широки треба да бидат булеварите, со каков состав, каква ќе биде велосипедската мрежа и каков ќе биде основниот сообраќаен систем на градот.

[ https://www.vecer.press/gup-ot-e-so-pominat-rok-od-chetiri-godini-noviot-doprva-ke-se-kroi/ ]

ВО 2028 СКОПЈЕ ЌЕ ДОБИЕ НОВ ГЕНЕРАЛЕН УРБАНИСТИЧКИ ПЛАН, ОД ГРАДОТ ВЕЛАТ ПРОЦЕСОТ БИЛ ЗАКОЧЕН ЧЕТИРИ ГОДИНИ

Во 2028 година се очекува да биде готов новиот Генерален урбанистички план (ГУП) за Град Скопје. Иако важноста на постојниот план беше до 2022, во мандатот на ексградоначалничката Данела Арсовска постапката за носење на нов ГУП беше закочена. Постапката за носење на новиот ГУП 2022-2023 почна во 2020 кога градоначалник беше Петре Шилегов и беше склучен договор помеѓу Министерството за транспорт и врски, Град Скопје и Агенцијата за планирање на просторот. Но, во мандатот на Арсовска не беше ништо преземено за продолжување на постапката за да може да се донесе новиот урбанистички план за градот.

Како што велат од кабинетот на градоначалникот Орце Ѓорѓиевски, со неговото доаѓање на функција овој процес е откочен и очекуваат новиот ГУП да биде донесен во 2028.

„Клучната пречка за продолжување на постапката е недовршеното сообраќајно решение, односно транспортниот модел на градот, кој претставува задолжителен аналитички инструмент за дефинирање на примарната сообраќајна инфраструктура, транспортните коридори и сценаријата за развој. Изработката на моделот е прекината поради необезбедени податоци од пописот во 2021, обработени по транспортни зони од страна на Државниот завод за статистика. Дополнителна системска пречка е неактивирањето на планската програма за ГУП-от. Иако програмата е изработена во 2022, истата не е внесена во информацискиот систем Е-урбанизам и не е ставена во постапка за одобрување од страна на градоначалникот. Согласно член 22 од Законот за урбанистичко планирање, постапката за донесување на генерален урбанистички план формално започнува со одобрување на планската програма, што значи дека правно-процедуралниот дел од процесот сè уште не е активиран“, велат од Град Скопје.

Понатаму, како што велат од Градот, изработката на Стратегиската оцена на влијанието врз животната средина е стопирана, бидејќи оваа постапка може да се спроведе единствено врз основа на изработен нацрт-план. Документационата основа, иако завршена во 2022 година, е засегната од значителни промени во реалните параметри на просторот, па е потребно целосно ажурирање на податоците, за да се обезбеди валидна аналитичка основа за понатамошното планирање.

„Во изминатиот период, новата градска управа спроведе длабинска анализа на состојбата, со цел да се утврдат сите административни, технички и институционални пречки кои го блокирале процесот. Во рамките на анализата беа одржани повеќе работни состаноци со Министерството за транспорт и врски, Агенцијата за планирање на просторот и релевантни експерти од областа на урбанистичкото планирање, транспортното моделирање и заштитата на животната средина. Склучен е договор со Државниот завод за статистика за обезбедување на податоците од пописот во 2021 по транспортни зони, неопходни за финализирање на транспортниот модел, активирана е постапката за одобрување на планската програма и за нејзино внесување во системот Е-урбанизам и склучени се анекс договори со Агенцијата за планирање на просторот и со изработувачот на сообраќајното решение, со цел ажурирање на документационата основа и продолжување на изработката на нацрт-планот“, објаснуваат од Град Скопје.

Од Градот велат дека визијата на новото раководство е насочена кон воспоставување одржлив, модерен и балансиран урбан развој кој ќе стави крај на неконтролираната урбанизација и ќе обезбеди подобар квалитет на живот за сите граѓани. Во таа насока, Градот во партнерство со УНДП веќе работи на проектен документ кој ќе овозможи изработка на 20-годишна визија за развој на Скопје, документ кој ќе ги постави стратешките насоки за просторно, инфраструктурно и економско планирање до 2045 година. Во неговата изработка, покрај домашната експертска јавност, ќе бидат вклучени и меѓународно етаблирани факултети и експерти, невладини организации, граѓански здруженија и други засегнати страни.

[ https://sdk.mk/index.php/naslovna/vo-2028-skopje-ke-dobie-nov-generalen-urbanistichki-plan-od-gradot-velat-protsesot-bil-zakochen-chetiri-godini/ ]( https://)