Од Министерството за спорт велат дека нивните надлежности завршиле по изградбата на објектот и извршениот технички прием, по што базенот ѝ бил предаден на Општината која е директно надлежна за неговото (не)работење.

На 31 јули минатата година се одржа свечено пуштање во употреба на затворениот училиштен базен, а тогаш на настанот присуствуваа пратеници од македонското Собрание, тогашниот градоначалник на Општината Орце Ѓорѓиевски, кој сега е прв човек во Град Скопје, потоа министерот за спорт Борко Ристовски и премиерот Христијан Мицкоски

Тогаш Ѓорѓиевски истакна дека базенот ќе има повеќе намени, како дел од наставниот процес на учениците, но и како опција за спортистите и младите од општината.

– Приоритет ќе имаат учениците од ООУ „Невена Георгиева Дуња“, како и учениците од другите основни училишта на подрачјето на Општина Кисела Вода. Потоа базенот ќе биде достапен и за спортските клубови и за граѓаните – рече Ѓорѓиевски на свеченото отворање лани.

Базенот е од затворен тип, со должина од 25 метри, ширина од 9 метри, додека, пак, длабочината варира од 0,8 до 1,2 метри. На свеченото отворање изведувачот на проектот посочи дека станува збор за современ полуолимписки базен, изграден според стандардите на ФИНА, а неговата намена е обука, едукација и рекреативно пливање.

Овој објект беше дел проектот за изградба на пет базени низ државата, кој го започна поранешната Агенција за млади и спорт уште во 2019 година, но со новата Влада и затворањето на Агенцијата, надлежноста за овој проект падна на плеќите на новоформираното Министерство за спорт, кое успеа по шест години од почетокот на градежните активности, да го заврши базенот во ОУ „Невена Георгиева Дуња“.

Од Министерството за спорт на оваа тема за „Слободен печат“ велат дека по изградбата на објектот и извршениот технички прием, базенот бил предаден на Општината, која е директно надлежна за неговото (не)работење.

-По завршувањето на изградбата и извршениот технички прием, Министерството за спорт го предаде базенот во ООУ „Невена Георгиева Дуња“ на Општина Кисела Вода, која е директно надлежна за управувањето со објектот, неговото користење и обезбедувањето услови за ставање во функција. За причините поради кои базенот сè уште не е во употреба, како и за информациите дали и во кој период бил користен од учениците и пливачите, конкретни податоци треба да обезбеди Општина Кисела Вода, во чија надлежност е управувањето со објектот по неговото предавање – велат од Министерството.

„Слободен печат“ испрати прашања и до Општина Кисела Вода, од каде до објавата на овој текст не одговорија која е причината за базенот воопшто да не проработи, ниту пак одговорија каква е моменталната состојба со објектот и кои се плановите за негово користење.

Исто така, од Министерството за спорт посочуваат дека нивната цел е да се направи модел на работење преку кој сите базени што се изградени со државни пари, ќе бидат стопанисувани и дадени на користење на Националната пливачка федерација.

„Слободен печат“ на оваа тема уште лани разговараше со претседателот на Националната пливачка федерација Сашо Лазаревски, кој тогаш истакна дека поради затворањето на базенот при „СЦ Борис Трајковски“, кој како опција тој тогаш го најави токму овој план, односно Федерацијата како алтернатива да започне да ги користи училишните базени во „Невена Георгиева Дуња“ во Кисела Вода, во Ѓорче Петров, како и базенот кај салата „Партизан“, односно кај основното училиште во Карпош, кој веќе од минатата недела е предаден на Пливачката федерација.

За разлика од оној во Карпош, базенот во Кисела Вода сè уште не ги примил првите пливачи, освен што во него се одржа еден церемонијален тренинг на денот на отворањето.

Исто така, тој тогаш најави дека се разгледува и можноста за префрлање на дел од пливачите на „Олимписки“, каде што денес тренираат еден дел, но има поплаки во однос на ценовникот бидејќи за еден пливач месечната тарифа е околу 5.000 денари, наспроти оние 3.000 што се плаќале во базенот „Карпош“.

Од Министерството за спорт истакнаа дека во моментот со повеќе општини се разговара за примена на овој модел, но засега нема постигнато договори освен за базенот во Карпош.

https://www.slobodenpecat.mk/bazenot-vo-nevena-georgieva-dunja-svecheno-se-otvori-no-nikogash-ne-proraboti/