Станарите велат дека во објектот има сериозни проблеми што ја доведуваат во прашање неговата безбедност и функционалност. Во зградата, според нив, нема хидранти, паркингот не е пуштен во употреба, а нема ниту соодветен пристап до просторот зад објектот, предвиден за заедничко домување.

Пристапот за пожарникарите – преку соседен двор

Токму проблемот со пристапот вчера дошол до израз кога во просторот зад зградата избувнал пожар и се запалил градежен шут. Во пожарот бил зафатен и спорниот дел на приземјето.

Бидејќи до просторот нема соодветен пристап, пожарникарите морале да влезат преку дворот на соседите, кои им овозможиле влез.

Случајот повторно го отвори прашањето за безбедноста на објектот и можноста противпожарните возила навреме да стигнат до критичните точки. Станарите прашуваат што ќе се случело доколку пожарот бил поголем и доколку бил загрозен човечки живот.

Наместо премин – изграден стан

Според станарите, просторот зад зградата требало да биде достапен преку премин предвиден во проектот. Наместо тоа, велат тие, на местото на предвидениот пристап е изграден стан.

За овој проблем, како што тврдат, повеќепати биле информирани надлежните во Општина Кисела Вода, но досега не е најдено решение.

Станарите велат дека до институциите се обратиле и поради нерешениот технички прием, имотните листови и други прашања поврзани со објектот. Дополнителна загриженост кај станарите предизвикува и безбедноста на самиот влез во зградата.

Тие велат дека на влезот нема соодветна безбедносна врата, туку обична врата што самите станари ја заклучуваат. Во неколку наврати, особено во вечерните часови, во скалишниот простор, велат, забележале сомнителни лица.

Поради тоа стравуваат за безбедноста на станарите, особено имајќи предвид дека објектот сè уште нема целосно регулиран статус.

„Не сакаме да чекаме да се случи трагедија за институциите да реагираат. Ние живееме во оваа зграда и сакаме да знаеме дали е безбедна и дали ги исполнува сите законски услови“, велат станарите.

Тие бараат надлежните институции итно да извршат инспекциски надзор, да ја проверат безбедноста на објектот, пристапот за противпожарните служби и причините поради кои повеќе од три години не е завршен техничкиот прием.

Случајот со вчерашниот пожар, според станарите, е сериозно предупредување. Вчера гореше градежен шут. Следниот пат може да биде загрозен човечки живот, велат тие, барајќи институциите да реагираат пред да биде предоцна.

https://mkd.mk/makedonija/pozhar-vo-zgrada-bez-tehnichki-priem-povekje-od-3-godini-stanarite-vo-kisela-voda-chekaat-imotni-listovi