📢Нова дирекција на Шпаркасе Банка(НИП-Центар)

Фотки од декември 2025 од зградата која ќе треба да се руши

Деталниот план за оваа парцела

[ https://www.facebook.com/ShansaZaCentar ]( https://)

Вест од 19.02.2026

ЗАСЕГА СПРЕЧЕНА ИЗГРАДБА НА 25-КАТНИЦА НА МЕСТОТО НА ПОРАНЕШНАТА ПЕЧАТНИЦА НА НИП „НОВА МАКЕДОНИЈА“ ВО ЦЕНТАРОТ НА СКОПЈЕ

Општина Центар засега не може да издаде градежна дозвола за изградба на 25-катница и 10-катница на местото на поранешната печатница на НИП „Нова Македонија“. Советот на Општина Центар не ја изгласа одлуката да се изврши техничка исправка во градежната парцела и со тоа Општината нема техничка можност да издаде одобрение за градба ако тоа го побара градежникот.

Како што стои во објаснувањето од Општината, техничката исправка треба да се направи поради грешка во техничкото исцртување, испишување и опремување на планот, отсуство на регулаторна линија, односно поради изостанување на планска одредба за граница на градежна парцела што се дефинира на графички начин со полна зелена линија со дебелина од 0,5 мм.На седницата присуствуваа и жители на околните згради кои рекоа доколку се изгради оваа зграда чудовиште ќе останат без зрак сонце и целосно ќе им се наруши хуманото живеење.

„Тука веќе е толку пренатрупано, па замислете каков хаос ќе се случи доколку се изгради ова чудовиште. Не знам каде ќе се паркираат сите тие возила и дали ќе остане слободен простор за живеење. Ве молиме да најдете начин и да не дозволите оваа зграда да се изгради“, рече Ангел Цветков, трета генерација жител во зградите зад „Нова Македонија“.

Советниците од „Шанса за Центар“ рекоа дека според Деталниот урбанистички план (ДУП), за овој дел површината за градба е 105.000 метри квадратни на основа од 5.200 метри квадратни.

„Согласно правилникот за урбанистичко планирање за таа површина со деловна намена потребни се 1.750 паркинг-места, кои може да се обезбедат само со 10 подземни нивоа. Коефициентот на искористеност е k=17, иако за сите околни градби е 4 или 5. Пристапниот пат до влезот за гаражата е залепен до постојните стари објекти без можност за тротоар“, рече советничката од „Шанса за Центар“ Билјана Филиповска-Тодорчевска.

Советниците од Левица рекоа дека се против оваа измена оти на било кој начин мора да се спречи изградбата на 25-катницата. Советнците од ЗНАМ рекоа дека ќе гласаат „против“ бидејќи ако се гласа „за“ се дава зелено светло утре да се почне со градење.

Советнците од СДСМ и ВМРО-ДПМНЕ рекоа дека ќе гласаат против, но им пречеше што советнците од „Шанса за Центар“ и Левица имаа дискусии на седницата велејќи дека прават пи-ар, се снимале за да се објавуваат на социјални мрежи и дека од вчера создаваат паника објавувајќи слика од зградата на Фејсбук. Рекоа дека на Комисијата за урбанизам едногласно било одлучено дека нема да се поддржи оваа точка и нема потреба да се водат дискусии кога сите биле против изградбата на зградата.

Од Секторот за урбанизам рекоа дека оваа одлука е само исправка на техничка грешка, а не носење на Детален урбанистички план и проект за градба.

„ДУП-от за овој дел е донесен во 2012 година. Сите знаете дека и со измена на план не можеме да намалиме катност, не може да се одземе веќе дадено право. Денес станува збор за техничка исправка во парцелата. Исто така манипулирате со бројки, максималната дозволена висина е 25 ката, но може инвеститорот ќе гради помал објект“, рекоа од Секторот на урбанизам.

На ова излагање, советникот од „Шанса за Центар“ Јане Димевски ја праваша општинарката дали ако не се изгласа техничката исправка тие ќе можат да издадат градежна дозвола на инвеститорот. На ова, од Секторот за урбанизам одговорија дека нема да може да се даде градежна дозвола ако не се направи техничка исправка. Но, додадоа дека инвеститорот сега може да ја тужи Општината, по што ќе треба да се исплати оштета од буџетот на Општина Центар. Исто така тогаш ќе добијат и судска одлука за постапување според одредбите од ДУП-от.

На крајот, сите советници гласаа против точката и со тоа не се изврши техничката измена.

Како што ни изјавија од Општина Центар, досега кај нив не е пристигнато барање за издавање градежна дозвола.

Деталниот урбанистички план за овој дел со кој се нацртани марчичките за 25-катницата и 10-катница е донесен во 2012, кога градоначалник беше Владимир Тодоровиќ, кандидат на ВМРО-ДПМНЕ, а ВМРО-ДПМНЕ го имаше мнозинството во Советот кој го гласаше овој ДУП-от, како и сите други со кои се смени ликот на Скопје.

[ https://sdk.mk/index.php/dopisna-mrezha/zasega-sprechena-izgradba-na-25-katnitsa-na-mestoto-na-poraneshnata-pechatnitsa-na-nip-nova-makedonija-vo-tsentarot-na-skopje/ ]

Маркичката за 25-катница кај НИП-от е стекнато право, кога-тогаш ќе се изгради кулата

Иако во подготовка е нов ДУП, законски инвеститорот веќе стекнал право да гради толку голем објект, што значи маркичките за двете висококатници ќе останат и во новиот план. Во спротивно, Општината ќе треба да обесштети милионски суми за штетата што би му ја предизвикала на инвеститорот доколку ја намали катноста.

Стометарскиот „џин“, како и 11-катницата веднаш до него, зацртани во ДУП Буњаковец 1, донесен уште во 2012 година во мандатот на градоначалникот Владимир Тодоровиќ, лоцирани на местото на Европски универзитет и печатницата на некогашната НИП „Нова Македонија“, сега-засега нема да се градат.

Во планот има техничка грешка, која требаше да ја исправат советниците на последната седница на Советот на Општина Центар, но тие гласаа против или беа воздржани, во обид да спречат инвеститорот да добие градежна дозвола, иако Комисијата за урбанизам претходно дала позитивно мислење за предлог-одлуката.

Како што беше објаснето, во согласност со законот за техничка грешка, исправката во донесен урбанистички план не подразбира никакви измени во планирањето или во параметрите на планот туку станува збор исклучиво за корекција на грешка во техничкиот дел на исцртување на планот. Во конкретниот случај, градежната парцела во мал дел не била целосно затворена, односно оформена.

Ние, како администрација, имаме обврска да ја ставиме точката на дневен ред и воедно да ги посочиме сите импликации. Советниците се тие што гласаат и ја носат одговорноста. Нема потреба од прозивки, медиумски пи-ар и театар. Овде станува збор за буџетот на граѓаните, а не за партиски интереси. Советот мора да носи одлуки во интерес на граѓаните, а не за дневнополитички калкулации – рече градоначалникот Горан Герасимовски.

Последиците од неизгласувањето на исправката се тоа што инвеститорот сега може да ја тужи Општината, по што ќе треба да се исплати отштета од општинскиот буџет. Притоа, иако во подготовка е нов план, законски инвеститорот веќе стекнал право да гради толку голем објект, што значи маркичките за двете висококатници ќе останат и во новиот ДУП. Во спротивно, Општината ќе треба да обесштети милионски суми за штетата што би му ја предизвикала на инвеститорот, доколку му се чепне во сè уште неизградените објекти и им се намали катноста.

Овој ДУП е од 2012 година и во тек е измена на овој план. Сакам да ви ги кажам бројките. Објектот е со 105.000 метри квадрати површина, 1.750 возила би гравитирале. За да може да се паркираат во тој простор, потребни се 10 нивоа под земја. Во однос на сообраќајот, ни оддалеку не може да ги задоволи потребите на сообраќајот за новиот објект. Намената му е Б4, голем трговски објект, а на сто метри ги имаме „Лимак“, „Рамстор“… Не ја гледам потребата на граѓаните да се „трпа“ Центар со таков објект – рече советничката од „Шанса за Центар“, Билјана Филиповска.

На седницата присуствуваше и граѓанин што зборуваше во име на жителите од старите згради зад печатницата. Тој посочи дека нечовечки е да бидат заробени од огромни згради, поради што нивните домови би биле во постојана сенка. Како што рече, и сега таму тешко се живее поради постојан метеж, недостиг на паркинг, а што би се случило доколку во непосредна близина никне објект на 25 ката, кој според него незамисливо би им влијаел врз квалитетот на животот.

Па, така, советниците не гласаа за исправка на грешката во ДУП-от и покрај сите последици што би ги имала Општината, откако добија одговор на прашањето дали може да се даде градежна дозвола ако не се поправи техничката грешка.

Секаде каде што има техничка грешка, спроведување на градежна парцела не е можно – одговорија од службите.

Огромната зграда од 100 метри височина, односно приземје и 25 ката, треба да се гради на местото каде што сега се наоѓа Европски универзитет, лоциран на улицата „Свети Климент Охридски“, во центарот на Скопје. Веднаш до неа, ќе се залепи уште една висококатница од 40 метри, на приземје и десет ката.

Според ДУП-от изработен од Друштвото за планирање проектирање и инженеринг „Тајфа план“ од Скопје, станува збор за објекти со Б4 намена, односно за деловни објекти, а според јавно достапните информации од Агенцијата за катастар на недвижности, земјиштето со површина од повеќе од 5.000 метри квадратни е во приватна сопственост на фирмата „Евро принт“ ДОО од Скопје.

За деталните урбанистички планови донесени во Општина Центар во 2012 година, меѓу кои е и ДУП Буњаковец 1, беше прогласен мораториум во мандатот на поранешниот градоначалник Саша Богдановиќ, со образложение дека при нивната изработка и донесување не се почитувани стандардите и нормативите за урбанистичко планирање и дека на тој начин е оштетен јавниот интерес, но и дека плановите се спротивни со Генералниот урбанистички план на Град Скопје.

Под мораториум беа дури 29 плана, а во меѓувреме ДУП-овите требаше да се ревидираат и да се отстранат неправилностите во нив. Но, Уставниот суд донесе одлука да се стопира мораториумот за градба во Општина Центар додека не се одлучи дали тој е уставна и законска категорија, со што сите тие повторно станаа важечки.

[ https://www.slobodenpecat.mk/markichkata-za-25-katnica-kaj-nip-ot-e-steknato-pravo-koga-togash-kje-se-izgradi-kulata/ ]

12 април, 2025

Шпаркасе Банка наскоро започнува со изградба на нова Централа во Скопје

Шпаркасе Банка АД Скопје се очекува наскоро да започне со изградба на нова модерна Централа, која ќе биде лоцирана на местото на постоечкиот Европски Универзитет во Скопје, на булевар „Св. Климент Охридски“ бр. 66.

Согласно Деталниот урбанистички план на овој простор се предвидува изградба на две згради една до друга, од кои едната ќе биде 10 ката, а другата висококатница со минимум 20 ката.

Според иницијалните планови, новата Централа на Шпаркасе Банка ќе биде лоцирана во една од овие две згради, која ќе располага со сопствен подземен паркинг и трезор за потребите на банката. Објектот ќе биде изграден според највисоки стандарди за енергетска ефикасност и технолошка опременост, нудејќи функционален и модерен работен простор за вработените и уште подобро искуство за клиентите.

Локацијата e во централното градско подрачје, во близина на институции и клучни сообраќајници, и претставува стратешки избор кој ќе обезбеди полесна достапност и одлична поврзаност со деловната и институционалната инфраструктура на градот.

По изградбата и преселбата во новата зграда, се очекува постојните две централи на Шпаркасе Банка во Скопје да бидат понудени на продажба. За објектот на банката во Охрид засега нема информации дали ќе се продава или задржи.

Со оваа стратешка инвестиција, Шпаркасе Банка јасно ги потврдува своите амбиции за понатамошен раст, модернизација и влез во топ 3 банки во земјава по сите релевантни показатели – пазарен удел, профитабилност и иновативност.

Според иницијалните планови, градежните работи се очекува да започнат кон крајот на годинава, по обезбедување на сите неопходни дозволи, а објектот се очекува да биде завршен и банката да се всели во него до крајот на 2028 година.

Дополнителни информации за изгледот на зградата и изведувачот на градежните работи ќе бидат објавени по официјализирањето на овие детали од страна на Банката.

[ https://bankarstvo.mk/shparkase-banka-naskoro-zapochnuva-so-izgradba-na-nova-tsentrala-vo-skopje/ ]