На просторот каде што беа старите тезги на Бит-пазар, каде што во изминативе неколку дена во тек е голема акција за нивно уривање и отстранување, „Скопски пазар“ ќе постави нови продажни места, со што ќе се комплетира реновирањето на еден од најголемите скопски зелени пазари.

Ова за „Слободен печат“ го соопштија од Општина Чаир, од каде што додаваат дека активностите ги врши „Скопски пазар“, кои се сопственици и управуваат со просторот

Од локалната самоуправа нагласуваат дека со ова реновирање не се менува суштинската намена на пазарот и нема да згасне пазарната дејност, туку старите тезги ќе бидат заменети со нови и ќе се направи генерално чистење на целиот простор.

Чистка на тротоарите кај „Мавровка“

Неколку денови порано, во близина на овие тезги, Град Скопје во заедничка акција со уште неколку институции и инспекторати, минатата недела ги отстрани сите импровизирани тезги на потегот од Бит-пазар кон „Мавровка“, при што беа запленети 500 килограми храна и најавени казни за нелегалните препродавачи.

Од Агенцијата за храна и ветеринарство соопштија дека во вонредниот инспекциски надзор со нив учествувале и комунални инспектори на Град Скопје, инспектори од Државниот пазарен инспекторат и полицијата, а во акцијата беа отстранети сите „диви“ тезги и импровизирани штандови долж булеварот „Кузман Јосифовски Питу“ во Чаир.

– Во раните утрински часови, инспекциските служби на Агенцијата за храна и ветеринарство во координирана акција со комуналните инспектори на Град Скопје, инспектори од Државниот пазарен инспекторат и припадници на Министерството за внатрешни работи, спроведоа вонреден инспекциски надзор над дивите продавачи на земјоделски производи, лоцирани долж булеварот „Крсте Петков-Мисирков“, на потегот од трговскиот центар Мавровка до Бит-пазар. Отстранети се сите диви тезги, повеќето со овошје и зеленчук – соопштија тогаш од Агенцијата.

Од АХВ тогаш најавија дека по акцијата, комуналните инспектори на Град Скопје ќе им изречат казни на сторителите што биле затекнати како нелегално препродаваат храна на оваа локација.

Второ големо реновирање на пазарот

Со уривањето и отстранувањето на старите тезги, се отвора патот за реновирање и генерално чистење на просторот, кој ќе биде исполнет со нови продажни објекти, но ќе остане со ист концепт на работење, односно нема да згасне пазарот. Ова е продолжение на последната голема акција од пред пет години, кога беше реновиран и покриен поголем дел од пазарот, а над тезгите се направи паркинг за околу 200 возила.

Тогаш од „Скопски пазар“ соопштија дека за проектот се одвоени околу 250 милиони денари, или нешто над четири милиони евра, а со овие средства се опфатени и реновирани вкупно 630 тезги и 175 локали.

Пазарот беше пуштен во употреба на 3 септември 2021 година, а оттогаш на ова место немаше поголеми активности во однос на реновирање и модернизирање на просторот.

https://www.slobodenpecat.mk/po-pet-godini-zapochna-renoviranjeto-na-preostanatite-stari-tezgi-na-bit-pazar/